Комиын видлаласны позянлунъяс, кыдзи сӧвмӧдны мача хоккей

Опубликовано: 17.12.2018

Коми Республикаса Веськӧдлан котырӧн Юрнуӧдысьӧс Медводдза вежысь Лариса Максимова дорын удж серти аддзысьлігӧн сёрнитісны Мужичӧйяслӧн командаяс костын мача хоккейысь мирса чемпионат кежлӧ дасьтысьӧм серти Республиканскӧй стадион выльмӧдӧм йылысь.

Аддзысьлӧмын участвуйтісны Россияса мача хоккейысь федерациялӧн олӧмӧ пӧртысь директор Сергей Мяус, Коми Республикаса вынйӧр сӧвмӧдан да спорт министр Николай Бережной, региональнӧй федерациялӧн да “Строитель” клублӧн президент Константин Агафонов.

Кыдз пасйис Лариса Максимова, республика выль пӧв видлаліс Мача хоккейысь мирса чемпионат нуӧдан площадка серти помшуӧмсӧ. Ордйысьӧмыс лоӧ 2021 воын.

“Талун кежлӧ ми сувтім сы вылын, мый бурджык лоӧ выльмӧдны Сыктывкарын Республиканскӧй стадион да сылысь запаснӧй полесӧ. Ӧні лӧсьӧдӧны проектно-сметнӧй документация”, - юӧртіс Лариса Максимова.

Стадион выльмӧдан проект серти “Строитель” Сыктывкарса хоккейнӧй командалы да олимпиада резервӧ дасьтан 1 №-а спорт школалы лӧсьӧдасны выль жыръяс, а сідзжӧ ӧнъяӧдасны видзӧдысьяслысь трибунаяссӧ. Запаснӧй поле вылын сувтӧдасны искусственнӧй йи вӧчан система да выль трибунаяс.

Сідзжӧ сёрнитчисны дасьтыны ӧтувъя “туй карта”, кӧні лоӧ пасйӧма стадион выльмӧдан да Коми Республикаын роч хоккей водзӧ вылӧ сӧвмӧдан тшупӧдъяс.

Казьтыштам, Россияса мача хоккейысь федерациялӧн олӧмӧ пӧртысь директор Сергей Мяус удж серти воис Сыктывкарӧ. Сійӧ нуӧдіс Коми Республикаын роч хоккей сӧвмӧдӧм серти аддзысьлӧмъяс, ветліс Эжваса да Краснозатонскӧй посёлокса юкӧнъясӧ, кӧні ворсӧны мача хоккейысь.

rss